Në më pak se 24 orë, dy makina kanë dalë nga rruga duke përfunduar në ujë. Aksidenti i parë është shënuar mbrëmjen e të premtes kur një mjet tip “Ford” ka dalë nga rruga dhe ka përfunduar në kanalin kullues përbri saj. Drejtuesi i saj Alfred Qosja 20 vjeç, është dërguar me urgjencë në spitalin e Lushnjës për të marrë ndihmën mjekësore. Sipas policisë, humbja e kontrollit të mjetit ka ndodhur si pasojë e shpejtësisë së madhe me të cilin udhëtonte i riu në aksin rrugor Divjakë-Çermë. Po nga humbja e kontrollit dyshohet që një makinë të ketë përfunduar në Lanë, në orët e para të mëngjesit të së shtunës. Policia njofton se në afërsi të Brrylit, një shtetas ende i paidentifikuar dyshohet se duke drejtuar mjetin, nuk ka mundur ta kontrollojë më dhe për pasojë makina ka dalë nga rruga duke rënë në lumin e Lanës. Pas aksidentit, drejtuesi i mjetit është larguar nga vendi i ngjarjes dhe grupi hetimor po vijon punën për identifikimin dhe kapjen e tij.