Disa foto të automjeteve të publikura nga Drejtoria e Përgjithshme e Shërbimeve të Transportit Rrugor të lënë pa fjalë. Jo se nuk jemi mësuar të shohim mjete që qarkullojnë në këtë gjendje, por habi të shkakton fakti se kështu të rrënuar tentojnë të kalojnë për kolaudim teknik. Por DPTSHRR që tashmë menaxhion kontrollin teknik të mjeteve, në postimin e saj në rrjetet sociale thotë se edhe në këtë gjendje këto mjete arrinin të kalonin kolaudimin vjetor. “Deri dje ja gjenin anën! Sot NGEL! NUK KALON KOLAUDIMIN! Këto parregullsi të rënda, disa prej tyre edhe në sistem drejtimi të mjetit, në goma, disa me rrezik për pasagjerët, për shikimin apo sistemin e dritave, për ambientin, për të tretët, shumica shkak për rrezik për mjetet e tjera në qarkullim apo për aksidente me pasoja, të gjitha për neglizhencë e moskokëçarje, moskujdes i gjatë mirëmbajtjeje mjeti, ju ngarkojnë me përgjegjësi”, thuhet ne postimin e DPTSHRR-së. Ndër të tjera kërkohet që drejtuesit e mjeteve të punojnë për riparimin e tyre sipas afatit ligjor duke paralajmëruar se strukturat përkatëse do të jenë pengesë e pakalueshme për këto raste skandaloze. “Do të shkohet deri në ndalimin përfundimtar të qarkullimit dhe masa të rënda për poseduesit e këtyre mjeteve nëse konstatohen në këtë gjendje në qarkullim”, thuhet në postimin e drejtorisë së përgjithsme të shërbimeve të transportit Rrugor.