Policia gjermane është në kërkim të një 21-vjeçari, që besohet se ka lidhje me qarqe islamiste, pasi një makinë u përplas me turmën në Paradën e Homoseksualëve në Berlin, duke vrarë një person dhe duke plagosur 16 të tjerë. Incidenti i së shtunës ndërpreu paradën ku po merrnin pjesë qindra mijëra njerëz, një prej ngjarjeve më të mëdha të këtij lloji në Evropë. Pjesëmarrësit u detyruan të largoheshin nga vendngjarja, ndërsa sirenat e policisë u dëgjuan gjatë gjithë natës. Policia i tha agjencisë AFP se makina e të dyshuarit u gjet e braktisur pranë parkut Tiergarten. Autoritetet nisën një operacion kërkimi që përfshinte helikopterë dhe policë nga disa lande gjermane, në të gjithë kryeqytetin. Policia dhe prokuroria u bënë thirrje qytetarëve të japin informacione për një 21-vjeçar të identifikuar si Abdul B., duke paralajmëruar se ai mund të jetë i armatosur dhe i rrezikshëm. Sipas një zëdhënësi të policisë, i dyshuari besohet se ka lidhje me “qarqe islamiste”. Sulmi ndodhi pak para orës 22:00 të së shtunës. Një automjet, i ngjashëm me një minifurgon ose një SUV, hyri në parkun Tiergarten dhe goditi disa persona”, tha policia. Në mesin e 16 personave të plagosur, tre janë në gjendje kritike, sipas zëdhënësit të zjarrfikësve të Berlinit. Rreth 30 persona të tjerë morën trajtim në vendngjarje pasi ishin në gjendje shoku. Policia e përshkroi të dyshuarin si një person me trup të hollë, rreth 1.90 metra i gjatë, me flokë të zinj, i veshur me një kapuç të zi dhe pantallona të bardha. Hetuesit thanë se besohet se disa persona janë plagosur me mjete të mprehta dhe se një ose më shumë persona janë parë duke dalë nga automjeti pas incidentit. Kancelari gjerman, Friedrich Merz, tha se përgjegjësit për incidentin do të përballen me drejtësinë. Përmes një deklarate, Merz e përshkroi ngjarjen si një “akt të tmerrshëm” dhe tha se ai dhe ministri i Brendshëm, Alexander Dobrindt, po informoheshin vazhdimisht për zhvillimet.