Shtrenjtimi i energjisë ka goditur edhe makinat elektrike. Cmimi i nevojshëm për të karikuar plotësisht një makinë të tillë, ka pësuar një rritje që mund të shkojë deri në 161 për qind krahasuar me vitin e shkuar. Sipas autorëve të një studimi të kryer në Itali, rritja e kostos së energjisë është një rrezik i madh edhe për makinat elektrike. Për shkak të rritjes së cmimit të energjisë tani, në disa raste, për të karikuar një makinë elektrike plotësisht shpenzohet më shumë se sa për një makinë tradicionale. E nëse në vend të karikimit në shtëpi zgjedh ta bësh këtë në një pikë të caktuar në rrugë, cmimi është akoma më i lartë... 12 muaj më parë, makina elektrike ishte ndjeshëm më ekonomike nga pikpamja e kostos së karburantit me një shpenzim që ishte 50 deri në 70 për qind më i ulët krahasuar me versionet me benzinë dhe dizel – thonë ekspertët. Në vitet e mëparshme, makinat elektrike konsideroheshin si makinat e të ardhmes, dhe të tilla mbeten në fakt. Por ndërsa kostoja më e ulët e përdorimit të tyre ishte një faktor kyc në rritjen e kërkesës për makina elektrike, prodhuesit tani druajnë për një kthim prapa.