Pas vetëdorëzimit në polici mbrëmjen e së enjtes, drejtori i Burgut të Rrogozhinës, Bilal Hasa është lënë i lirë pas marrjes në pyetje nga policia. Hasa u vetëdorëzua në polici vetëm disa orë pasi u shpall në kërkim pas gjetjes së 4 mijë rrënjëve kanabis në një magazinë në Peqin, për të cilën pretendohej se ishte në pronësi të tij. Por gjatë marrjes në pyetje, një gjë e tillë është hedhur poshtë nga drejtori i Burgut të Rrogozhinës, ku ka deklaruar se banesa dhe magazinat janë në pronësi të vëllait të tij dhe se ai nuk ka asnjë lidhje me këtë veprimtari të paligjshme. Hetimi për Bilal Hasën do të vijojë në gjendje të lirë, teksa për të është marrë masa e pezullimit nga detyra si drejtor i Burgut të Rrogozhinës, ndërkohë që I vëllai I tij është shpallur në kërkim nga policia. Sasia e bimëve narkotike u zbulua nga një aksion I një ditë më parë nga Policia e Shtetit në bashkëpunim me Policinë e Elbasanit. Gjatë operacionit policor të koduar "Kurtaj" policia sekuestroi 4 mijë rrënjë bimë narkotike kanabis sativa, llampa, neonë e pajisje të tjera elektrike. Në vijim të veprimeve hetimore policia shpalli në kërkim për veprën penale të shpërdorimit të detyrës edhe përgjegjësin e OSHEE për zonën e Peqinit.