Vjedhja e kabllove të bakrit po kthehet në një problem serioz për infrastrukturën publike në Greqi, duke prekur rrugë, rrjete energjetike, telekomunikacionin dhe struktura të tjera publike. Një nga shqetësimet kryesore është dëmtimi i sistemeve të ndriçimit në autostrada dhe rrugët kombëtare, ku vjedhja e kabllove mund të lërë segmente të tëra në errësirë dhe të rrisë rrezikun e aksidenteve rrugore. Autorët synojnë kryesisht rrjetet nëntokësore të bakrit që furnizojnë ndriçimin rrugor dhe semaforët, ndërsa në disa raste vidhen edhe kapakët metalikë të pusetave. Sipas raportimeve, të mediave greke, grupet kriminale shpesh paraqiten me veshje pune për të mos tërhequr vëmendjen. Ata hapin pusetat në anë të rrugëve, presin kabllot dhe më pas përdorin automjete të fuqishme për të tërhequr dhe shkëputur qindra metra rrjet nëntokësor.