Bosi i shumëkërkuar i mafias Matteo Messina Denaro, në arrati prej 30 vitesh, është arrestuar nga karabinierët italianë në një klinikë private në Palermo. Hetimi që ka cuar në prangosjen e kryemafiozit të Kastelvetranos është koordinuar nga prokurorët Maurizia de Lucia dhe Paolo Guido – raportojnë mediat italiane. Më këtë mënyrë ka përfunduar arratia e shefit të Cosa Nostras por detajet e operacionit që coi në kapjen e tij ende nuk janë bërë të njohura. Prej kohësh në Itali, Messina Denaro konsiderohej i kërkuari numër një, dhe në jo pak raste ka arritur ti shpëtojë arrestimit. Pas arrestimit nga autoritetet të Toto Rinës dhe Bernardo Provenzanos, Matteo Messina Denaro konsiderohej si shefi i ri i Cosa Nostra-s, dhe mundi të udhëhiqte mafien në dekadat e fundit duke u bërë një lloj fantazme. Arrestimi i tij përbën një goditje të fortë për mafien ndërkohë që ai ishte edhe një prej të arratisurve më të frikshëm në botë.