Presidenti i Venezuelës Nicolas Maduro ka vringëlluar një shpatë në ajër dhe është zotuar të sfidojë Shtetet e Bashkuara, në shfaqjen e tij të fundit, të çuditshme. Presidenti 63-vjeçar u pa me uniformë kamuflazhi dhe nxorri shpatën para turmave në Karakas. Duke tundur armën, e identifikuar nga zyrtarët si "Shpata historike e Perusë", e Simón Bolívarit, Maduro thirri: "Ne duhet të jemi gati të mbrojmë çdo pëllëmbë të kësaj toke të bekuar nga kërcënimi ose agresioni imperialist, pavarësisht se nga vjen". "Dështimi nuk është një opsion!" – vijoi Maduro. Edhe ndërsa anijet luftarake afrohen dhe bombarduesit bërthamorë amerikanë po e rrethojnë, Maduro po përpiqet të projektojë forcë, me një shpatë në dorë, duke u ngritur kundër "agresionit imperialist" dhe duke lënë të kuptohet se mund të flasë edhe me Trumpin. Ai u tha turmave që brohorisnin në Karakas: "Kombi kërkon përpjekjen dhe sakrificën tonë më të madhe". Vetëm disa ditë më parë, ai bëri një thirrje të fundit për paqe duke kënduar me zë të lartë këngën "Imagine" të John Lennon. Shfaqja e fundit surreale e Maduro-s vjen pasi Presidenti Donald Trump e etiketoi zyrtarisht rrethin e tij të ngushtë si "narko-terrorist". SHBA e shpalli Cartel de los Soles të Venezuelës si një organizatë terroriste të huaj, duke akuzuar Maduron se drejton një perandori kriminale të rrënjosur në shtet, që ka korruptuar ushtrinë, agjencitë e inteligjencës, gjykatat dhe parlamentin. Zyrtarët thonë se Cartel de los Soles nuk është një kartel tradicional, por një rrjet i gjerë patronazhi brenda shtetit venezuelian. Nga gjeneralët te shefat e inteligjencës, ata taksojnë, mbrojnë dhe transportojnë kokainën duke përdorur avionë ushtarakë, kanale diplomatike dhe institucione shtetërore. Ushtria amerikane ka mbledhur ndërkohë një prani të fortë rreth Venezuelës, nën Operacionin Shtiza Jugore, me dhjetëra anije të marinës dhe rreth 12 mijë trupa.