Presidenti i rrëzuar i Venezuelës, Nicolas Maduro, do të paraqitet në gjykatën federale të Manhattanit për t'u përballur me akuzat për narko-terrorizëm, disa ditë pasi kapja e tij nga ushtria amerikane shkaktoi pasiguri të thellë rreth të ardhmes së kombit të pasur me naftë të Amerikës së Jugut. Maduro, 63 vjeç, dhe gruaja e tij, Cilia Flores, janë burgosur në Brooklyn pasi forcat amerikane i morën ata nga Karakasi në një operacion të papritur në fundjavë. Të dy do të paraqiten në seancën dëgjimore të planifikuar për orën 12:00 para gjyqtarit të distriktit amerikan Alvin K. Hellerstein. Nuk është e qartë nëse ndonjëri prej tyre ka avokatë, apo nëse do të pranojnë fajësinë. SHBA-të e kanë konsideruar Maduron një diktator të paligjshëm që kur ai shpalli fitoren në zgjedhjet e vitit 2018 të njollosura nga akuzat për parregullsi masive. Kapja e tij shënon ndërhyrjen më të diskutueshme të Uashingtonit në Amerikën Latine që nga pushtimi i Panamasë 37 vjet më parë. Prokurorët thonë se Maduro është boshti i një karteli zyrtarësh politikë dhe ushtarakë venezuelianë që kanë komplotuar për dekada me grupet e trafikut të drogës dhe organizatat e shpallura terroriste nga SHBA-ja për të përmbytur vendin me mijëra ton kokainë. Madoro u padit për herë të parë në vitin 2020 si pjesë e një çështjeje të gjerë për trafikim narkotikësh. Në një aktakuzë të re të zbuluar të shtunën, prokurorët pretendojnë se Maduro personalisht mbikëqyri një rrjet trafiku kokaine të sponsorizuar nga shteti që bashkëpunon me disa nga grupet më të dhunshme të trafikut të drogës në botë, duke përfshirë kartelet Sinaloa dhe Zetas të Meksikës, grupin paramilitar kolumbian FARC dhe bandën venezueliane Tren de Aragua. Maduro akuzohet për narkoterrorizëm, komplot për importimin e kokainës, posedim të armëve dhe pajisjeve shkatërruese etj. Ai përballet me dekada burg e ndoshta edhe burg të përjetshëm për secilën akuzë nëse dënohet.