Kremlini të mërkurën kritikoi komentet e Presidentit Francez Emmanuel Macron se Parisi është i hapur për vendosjen e armëve bërthamore në vendet e tjera evropiane, duke thënë se kjo nuk do të rriste sigurinë e kontinentit. "Amerikanët kanë bomba në avionë, në Belgjikë, Gjermani, Itali, Turqi", tha Macron për televizionin francez TF1 të martën. "Ne jemi gati ta hapim këtë diskutim. Do të përcaktoj edhe kornizën në një mënyrë shumë specifike në javët dhe muajt që vijnë", tha ai. I pyetur për komentet e Macron, zëdhënësi i Kremlinit Dmitry Peskov tha: "Përhapja e armëve bërthamore në kontinentin evropian është diçka që nuk do të shtojë siguri, parashikueshmëri dhe stabilitet". "Tani për tani, i gjithë sistemi i stabilitetit dhe sigurisë strategjike është në një gjendje të mjerueshme për arsye të dukshme", tha Peskov. Macron e hodhi idenë e zgjerimit të mbrojtjes së arsenalit bërthamor të Francës në vendet e tjera evropiane në mars. Kremlini tha në atë kohë se kjo përbënte një pohim nga Franca se synonte "udhëheqjen bërthamore në Evropë", çka ai e quajti "shumë, shumë konfrontuese".