Presidenti francez Emmanuel Macron ka paralajmëruar se kërcënimi i sulmeve hibride nga Rusia kundër Evropës dhe Francës është intensifikuar. Në një konferencë për shtyp në Pallatin Elysee, Macron tha se kishte urdhëruar një plan për të mbrojtur infrastrukturën kritike dhe vendet e industrisë së mbrojtjes përballë këtij kërcënimi. Ai tha se Franca ishte shënjestruar nga sulmet hibride ruse në javët e fundit, të cilat nuk do të mbeteshin “pa përgjigje”. Një numër gjithnjë e në rritje i udhëheqësve evropianë kanë paralajmëruar se Rusia mund të jetë duke përgatitur sulme për të testuar angazhimin e tyre në mbështetjen e Ukrainës. Lufta hibride ose sulmet hibride janë terma të lirshëm që kanë tendencë të përshkruajnë metoda jo-ushtarake, për shembull sulmet kibernetike, sabotimin ose dezinformimin, të dizajnuara për të ushtruar presion dhe për të destabilizuar një kundërshtar. Këto përdoren mjaft shpesh duke përdorur ndërmjetës, por Rusia gjithmonë mohon përfshirjen në sulme të tilla pavarësisht provave në rritje që tregojnë të kundërtën.