Plani i paqes i Presidentit amerikan Donald Trump ka nevojë për përmirësim që të bëhet i pranueshëm për Ukrainën dhe Evropën, tha Presidenti francez Emmanuel Macron. Një propozim paqeje me 28 pika i bërë javën e kaluar nga SHBA zuri në befasi shumë njerëz në qeverinë amerikane, në Kiev dhe Evropë, dhe shkaktoi shqetësime të reja se administrata Trump mund të jetë e gatshme ta shtyjë Ukrainën të nënshkruajë një marrëveshje që anon shumë nga Moska. "Është një iniciativë që shkon në drejtimin e duhur: drejt paqes. Megjithatë, ka aspekte të atij plani që meritojnë të diskutohen, negociohen dhe përmirësohen", tha Macron. "Ne duam paqe, por nuk duam paqe që në fakt është një kapitullim". Ai shtoi se vetëm ukrainasit mund të vendosin se çfarë lëshimesh territoriale janë të gatshëm të bëjnë. "Ajo që u vu në tryezë na jep një ide se çfarë do të ishte e pranueshme për rusët. A do të thotë kjo se është ajo që duhet të pranohet nga ukrainasit dhe evropianët? Përgjigja është jo", shtoi Macron. Po ashtu, macron e konsideroi të papranueshëm kufizimin e ushtrisë ukrainase dhe tha se asetet e ngrira ruse janë në Evropë dhe vetëm Evropa mund të vendosë se çfarë të bëjë me to.