Presidenti francez Emmanuel Macron ka thirrur një takim të partive kryesore politike të Francës të premten përpara një afati të vendosur për të emëruar një kryeministër të ri, pasi shefi i bankës qendrore të vendit paralajmëroi se kriza politike po frenonte rritjen. Macron është në kërkim të kryeministrit të tij të gjashtë në më pak se dy vjet dhe do të duhet të gjejë një personalitet, i cili të pranohet si nga qendra e djathtë ashtu edhe nga qendra e majtë, në mënyrë që të kalojë një buxhet përmes një parlamenti të fragmentuar dhe të përçarë. Zyra e presidentit tha vonë të mërkurën se ai do të emërojë kryeministrin e tij të ardhshëm brenda 48 orëve. Disa emra kanë qarkulluar në qarqet politike, përfshirë centristin veteran Jean-Louis Borloo, kreun e auditorit publik Pierre Moscovici dhe Sebastien Lecornu, i cili dha dorëheqjen si kryeministër të hënën dhe dukej se e përjashtoi veten nga gara. Franca, ekonomia e dytë më e madhe e eurozonës, është e zhytur në krizën e saj më të thellë politike në dekada, pjesërisht e shkaktuar nga vetë Macron i cili vuri bast dhe dështoi vitin e kaluar, duke shpallur zgjedhje të parakohëshme që cuan në një parlament akoma më të fragmentarizuar.