Presidenti francez Emmanuel Macron dhe kryeministri britanik Keir Starmer do të udhëtojnë për në Uashington javën e ardhshme mes alarmit në Evropë për qëndrimin e ashpër të presidentit Donald Trump ndaj Ukrainës dhe ‘ngrohjen’ e administratës së tij ndaj Moskës për konfliktin trevjeçar. Udhëheqësit e dy fuqive bërthamore të Evropës, të cilët do të udhëtojnë të ndarë, do të përpiqen të bindin Trumpin që të mos nxitojë për një marrëveshje armëpushimi me Vladimir Putin, që të mbajë Evropën të përfshirë dhe të diskutojë garancitë ushtarake për Ukrainën. Macron, i cili po përpiqet të përfitojë nga një marrëdhënie personale e tij me Trumpin, e ndërtuar gjatë mandateve të tyre të para presidenciale, ka thënë se pranimi i një marrëveshjeje të keqe që do të përbënte një kapitullim të Ukrainës e do të sinjalizonte dobësi të Shteteve të Bashkuara, përballë armiqve si Kina dhe Irani.