Presidenti francez Emmanuel Macron po anon drejt njohjes së një shteti palestinez, por diplomatët dhe ekspertët thonë se një veprim i tillë mund të jetë një mënyrë e parakohshme dhe joefektive për të ushtruar presion mbi Izraelin që të ecë drejt një marrëveshjeje paqeje me palestinezët. Ata thonë se kjo mund të thellojë përçarjet, jo vetëm brenda Bashkimit Evropian tashmë të ndarë, por edhe me Shtetet e Bashkuara, aleatin më të fortë të Izraelit, dhe do të duhet të shoqërohet me masa të tjera si sanksione dhe ndalime tregtare nëse njohja do të ishte diçka më shumë se një gjest simbolik. Zyrtarët francezë po e shqyrtojnë këtë veprim përpara një konference të Kombeve të Bashkuara, të cilën Franca dhe Arabia Saudite po e organizojnë bashkë mes 17 dhe 20 qershorit, për të përcaktuar parametrat për një plan drejt krijimit të një shteti palestinez, duke garantuar njëkohësisht sigurinë e Izraelit. Nëse Macron do të hedhë hapin, Franca, shtëpia e komuniteteve më të mëdha hebraike dhe myslimane të Evropës, do të bëhej fuqia e parë perëndimore që do të njihte një shtet palestinez, duke i dhënë potencialisht një vrull më të madh një lëvizjeje të dominuar deri më tani nga kombe më të vogla që në përgjithësi janë më kritike ndaj Izraelit. "Nëse Franca lëviz, disa vende evropiane do ta ndjekin", tha për Reuters Ministri i Jashtëm Norvegjez Espen Barth Eide. Qëndrimi i Macronit ka ndryshuar mes ofensivës së intensifikuar të Izraelit në Gaza dhe dhunës së përshkallëzuar nga kolonët izraelitë në Bregun Perëndimor, dhe në Paris ekziston një ndjenjë gjithnjë e më e madhe urgjence për të vepruar tani përpara se ideja e një zgjidhjeje me dy shtete të zhduket përgjithmonë. "Duhet të kalojmë nga fjalët në vepra. Përballë fakteve në terren, perspektiva e një shteti palestinez duhet të ruhet. Masat e pakthyeshme dhe konkrete janë të nevojshme", tha një këshilltare e Macron. Diplomatët paralajmërojnë se ndërsa Macron tani favorizon lëvizjen, ai ende nuk ka marrë një vendim përfundimtar dhe gjërat mund të ndryshojnë. Megjithatë, po punohet në këtë drejtim. Zyrtarët izraelitë kanë kaluar muaj duke lobuar për të parandaluar atë që disa e kanë përshkruar si "një bombë bërthamore" për marrëdhëniet dypalëshe. Ideja që Franca, një nga aleatët më të ngushtë të Izraelit dhe një anëtare e G7, mund të njohë një shtet palestinez, me siguri do ta zemëronte kryeministrin izraelit Benjamin Netanyahu. Kur Britania dhe Kanadaja iu bashkuan Francës këtë muaj për të thënë se mund të vendosin masa konkrete ndaj Izraelit dhe të angazhohen për të njohur një shtet palestinez, Netanyahu lëshoi një qortim të fortë, duke akuzuar udhëheqësit e tre vendeve për antisemitizëm.