Presidenti Emmanuel Macron vizitoi të dielën territorin francez të Saint Pierre dhe Miquelon, ku pritet të takohet me kryeministrin kanadez Mark Carney, disa javë pasi presidenti amerikan Donald Trump publikoi një imazh në rrjetet sociale që tregonte arkipelagun të mbuluar me flamurin amerikan. Vizita e Macron, e para nga një president francez që kur François Hollande udhëtoi atje në vitin 2014, vjen në një kohë kur Kanadaja kërkon të thellojë lidhjet me Bashkimin Evropian, mes tensioneve tregtare me Shtetet e Bashkuara dhe përkeqësimit të marrëdhënieve me Uashingtonin nën administratën Trump. I vendosur pranë bregut të Atlantikut të Kanadasë, Saint Pierre dhe Miquelon është i vetmi territor francez që ka mbetur në Amerikën e Veriut. Zyrtarët francezë thanë se udhëtimi do të nënvizonte sovranitetin e Francës mbi arkipelagun dhe do të theksonte marrëdhëniet e ngushta me Kanadanë. "Për një territor me 5,800 banorë, është e rrallë të gjesh kaq shumë çështje të rëndësishme për Francën në tërësi, të përqendruara në një vend të kësaj madhësie: prania gjeostrategjike e Francës në Atlantikun e Veriut, në pragun e Shteteve të Bashkuara dhe Arktikut; sovraniteti detar; përshtatja ndaj ndryshimeve klimatike; dhe bashkëpunimi me Kanadanë," u tha gazetarëve një zyrtar i presidencës franceze. Diplomatët thanë se vizita ka gjithashtu peshë simbolike, pasi Trumpi publikoi një hartë që tregonte Shtetet e Bashkuara, Kanadanë, Grenlandën, Islandën, Meksikën, Amerikën Qendrore dhe Karaibet të mbuluara me flamurin amerikan dhe të etiketuara si "Shtetet e Bashkuara të Amerikës".