Presidenti francez Emmanuel Macron njoftoi gjatë festimeve të D-Day të enjten se Ukraina do të marrë avionë të rinj luftarakë. Macron iu bashkua presidentit të SHBA Joe Biden, presidentit ukrainas Volodymyr Zelensky dhe liderëve të tjerë botërorë në ceremonitë e organizuara me rastin e 80-vjetorit të zbarkimit të më shumë se 150 mijë trupave aleate në plazhet e Normandisë, më 6 qershor 1944, cka edhe coi në fillimin e clirimit të evropës së pushtuar nga nazistët gjatë luftës së dytë botërore. “Ne do të nisim një bashkëpunim të ri dhe do të njoftojmë transferimin e avionëve luftarakë Mirage 2000-5 në Ukrainë të prodhuar nga prodhuesi francez Dassault si edhe do të trajnojmë pilotët ukrainas në Francë”, tha Macron për TV francez. Macron shtoi se zyrtarët ukrainas, përfshirë Zelensky-n, kërkuan nga të gjithë aleatët për më shumë ndihma, në luftën kundër Rusisë. Macron tha se ai nuk dëshiron përshkallëzim por "paqja" mund të arrihet vetëm nëse Ukraina është në gjendje të mbrohet. Macron gjithashtu i tha Zelenskyt në gjuhën ukrainase: "Ne jemi me ju dhe nuk do t'ju zhgënjejmë". Avionët luftarakë Mirage 2000-5 janë avionë me shumë funksione me një motor të zhvilluar në vitet 1970 që evoluan pas fundit të shekullit. Macron tha se franca po ndërton një koalicion me vende të tjera, për të siguruar avionë të ngjashëm me F-16, për ukrainën. Dassault Aviation prodhoi rreth 600 avionë Mirage 2000, gjysma e të cilëve u eksportuan në tetë vende, përfshirë Greqinë, Emiratet e Bashkuara Arabe dhe Tajvanin. Mirage 2000-5 është një variant i përditësuar i mbrojtjes ajrore me radar të përmirësuar. Ai mban raketat ajër-ajër Mica, si dhe raketat e lundrimit Scalp që Franca ia ka dhënë Ukrainës më herët. Macron nuk tha se sa avionë do të ofrojë Franca, duke theksuar se detajet do të mësohen në vazhdim.