Pronarja e një maceje franceze është gjobitur me afro 1,200 euro pasi kafsha e saj shtëpiake hynte pa leje në kopshtin e një fqinji. Macja e Dominik Valdes, Rémi, u shpall fajtore për shkaktimin e dëmtimit në pronën e fqinjit në qytetin francez Agde, pasi një gjykatë dëgjoi se si kafsha kishte urinuar mbi një jorgan, kishte lënë jashtëqitje në kopsht dhe kishte lënë gjurmë putrash në një mur. Vendimi fillestar u dha në janar, duke e detyruar Valdes të paguante gati 500 euro dëmshpërblim dhe afro 800 euro shpenzime ligjore. Dënimi përfshinte një gjobë prej 30 eurosh çdo herë që macja do të kalonte përsëri gardhin për në pronën e fqinjit. Tani, Remi është akuzuar për përsëritje të veprës penale, që do të thotë se zonja Valdes do të duhet të kthehet në gjykatë në dhjetor dhe përballet me pagesën e një fature prej gati 2 mijë eurosh. Duke folur për mediat franceze, Valdes tha se padia i kishte shkaktuar një ngarkesë të rëndë mendore: "Kur më komunikuan dënimin, ishte sikur të më kishin goditur me tullë në kokë". Ajo pranon se cështja i ka shkaktuar pagjumësi dhe se i është dashur të fillojë psikoterapi për të përballuar stresin. E ndërkohë, macja Remi ka filluar të shtojë peshë, pasi duke qenë e detyruar të qëndrojë brenda në shtëpi, është e prirur të hajë më shumë. "Nuk mund ta lë të dalë në kopsht nga frika se mos hidhet përsëri në kopshtin e fqinjit. Është sikur të jetë dënuar me arrest shtëpie", thotë Valdes.