Forcat ruse dhe ukrainase po zhvillojnë luftime të ashpra, për kontrollin e qyteteve Pokrovsk dhe Kupiansk, dy pika me rëndësi strategjike në frontin lindor të Ukrainës. Në Pokrovsk, i njohur si “porta drejt Donetskut”, njësitë speciale ukrainase po përballen me ofensiva të fuqishme nga trupat ruse. Nëse Rusia arrin ta marrë qytetin, ajo do të mund të forcojë ndjeshëm pozitat në lindje të Ukrainës dhe të sigurojë kontroll të gjerë mbi rajonin. Sipas shërbimeve sekrete ukrainase, “luftimet e ashpra me pushtuesit rusë po vazhdojnë. Pas një operacioni të suksesshëm zbarkimi, forcat speciale ukrainase çanë korridorin tokësor dhe u bashkuan me njësi të tjera.” Raportohet gjithashtu se po zhvillohen misione shtesë në qytet dhe përpjekje për të mbrojtur linjat e furnizimit të ushtrisë ukrainase. Ndërkohë, Ministria ruse e Mbrojtjes deklaroi se trupat e saj kanë epërsi në betejat rreth Kupianskut, në verilindje të Ukrainës, dhe se kanë kryer sulme ajrore gjatë natës ndaj objektivave që, sipas tyre, mbështesin infrastrukturën energjetike ushtarake të Kievit. Kupiansku është një nyje e rëndësishme transporti dhe logjistike, e cila ka kaluar disa herë nën kontrollin e palëve që nga fillimi i luftës.