Forcat speciale ruse ecën për disa kilometra brenda një gazsjellësi në rajonin e Kurskut për të sulmuar nga prapa njësitë ukrainase, raporton ushtria ukrainase dhe blogerët rusë. Ky veprim vjen pasi Ukraina mori nën kontroll një pjesë të madhe të territorit në Kursk gjatë një ofensive të befasishme në gusht, ku pushtoi qytetin strategjik Sudzha dhe mori qindra robër lufte. Kievi tha se operacioni kishte si qëllim të siguronte një avantazh në negociatat e paqes dhe të detyronte Rusinë të largonte trupat nga Ukraina Lindore. Pas disa muajsh, ushtria ukrainase është nën presion të vazhdueshëm nga më shumë se 50 mijë trupa ruse, përfshirë aleatë si Koreja e Veriut. Sipas Associated Press, blogerët e luftës pro-Kremlinit raportuan se trupat ruse kaluan deri 15 kilometra brenda gazsjellësit dhe i sulmuan ukrainasit nga prapa. Qyteti Sudzha ka rëndësi për shkak të stacioneve të gazit, që ishin të përdorura për eksportin e gazit natyror në Evropë. Shtabi i Përgjithshëm i Ukrainës konfirmoi se forcat speciale ruse u zbuluan dhe u kundërshtuan me raketa dhe artileri, duke shkaktuar humbje të mëdha për ta.