Presidenti rus Vladimir Putin tha se mendon që konfliktit të Rusisë me Ukrainën po i vjen fundi, duke iu drejtuar gazetarëve pas një parade ushtarake të reduktuar në Moskë që shënoi fitoren sovjetike në Luftën e Dytë Botërore. "Mendoj se çështjes po i vjen fundi", tha ai, duke iu referuar "operacionit special ushtarak" në Ukrainë, sic e quan ai, ndërsa dënoi mbështetjen perëndimore për qeverinë e Kievit. Paradës vjetore të Rusisë i mungonte shfaqja e zakonshme e tankeve dhe raketave, për shkak të shqetësimeve të sigurisë, pasi autoritetet kishin frikë se Ukraina mund të godiste Sheshin e Kuq me dronë. Një armëpushim i minutës së fundit mes Moskës dhe Kievit, e uli rrezikun e çdo sulmi dhe parada kaloi pa incidente. Komentet e Putinit erdhën vetëm disa orë pasi ai përdori fjalimin e tij të Ditës së Fitores për të justifikuar luftën. Në atë fjalim ai tha se Rusia po bënte një luftë "të drejtë" dhe e quajti Ukrainën një "forcë agresive" që po "armatosej dhe mbështetej nga i gjithë blloku i NATO-s". Më vonë, kur u pyet në një konferencë për shtyp në lidhje me ndihmën që Perëndimi po i jep Ukrainës, Putin tha: "Ata premtuan ndihmë dhe më pas filluan të nxisin një konfrontim me Rusinë që vazhdon edhe sot e kësaj dite. Mendoj se çështja po merr fund, por është një çështje serioze." Forcat ruse pushtuan Krimenë dhe pjesë të Ukrainës lindore në vitin 2014, pastaj nisën një pushtim të plotë të Ukrainës në shkurt të vitit 2022.