Lufta në Lindjen e Mesme pritet të jap efektet e saj, duke përshpejtuar inflacionin në nivel global. Sipas një ankete të Bloomberg me ekonomistë në mbarë botën, gjysma e tyre parashikojnë rritje më të shpejtë të çmimeve në eurozonë dhe në Shtetet e Bashkuara, ndërsa rreth 40% presin një përshpejtim të inflacionit edhe në Kinë. Ngushtica e Hormuzit, nga ku kalon rreth një e pesta e furnizimit detar global me naftë, është paralizuar, duke shtuar presionin mbi çmimet e naftës dhe gazit. Paralelisht, priten efekte zinxhir si rritja e çmimeve të biletave ajrore, kostove të transportit dhe goditje të mundshme të zinxhirëve të furnizimit nëse konflikti zgjatet. Por, ekspertët theksojnë se më të prekurit nga efektet e luftës janë vendet importuese si Kina, Europa dhe India, ndërsa eksportuesit si Rusia, Kanadaja dhe Norvegjia mund të përfitojnë. Ndërkohë, Shtetet e Bashkuara të Amerikës, të përfshira në luftë, sipas ekonomistëve nuk do t’i ndjejnë pasojat e saj. Sipas tyre, ndikimi në Prodhimin e Brendshëm Bruto të SHBA-së do të jetë i kufizuar në afat të shkurtër.