Franca do të zëvendësojë platformat amerikane të videokonferencave Microsoft Teams dhe Zoom me platformën e saj vendase, Visio, e cila do të përdoret në të gjitha institucionet qeveritare deri në vitin 2027. Lajmi u bë i ditur nga qeveria franceze, e cila e cilëson këtë hap pjesë të një strategjie më të gjerë për të ulur varësinë nga Shtetet e Bashkuara të Amerikës, dhe për të forcuar sovranitetin digjital të vendit. Sipas autoriteteve, qëllimi është rikthimi i kontrollit mbi infrastrukturën kritike digjitale dhe garantimi i sigurisë dhe konfidencialitetit të komunikimeve elektronike publike. Ky vendim vjen në një moment kyç, teksa Franca dhe vendet evropiane po rivlerësojnë varësinë nga teknologjitë e huaja. Sipas autoriteteve franceze, kjo strategji nënvizon angazhimin e vendit për pavarësi digjitale, në një kontekst tensionesh gjeopolitike në rritje dhe frikash për mbikëqyrje të huaj apo ndërprerje të shërbimeve kritike.