Ministri i Jashtëm turk Hakan Fidan tha të dielën pas bisedimeve në Bagdad se duhet të nisë një betejë e përbashkët duke përdorur "të gjitha burimet në dispozicion" për të eliminuar si Shtetin Islamik ashtu edhe militantët kurdë në rajon. Vizita e ministrit të jashtëm turk në irak, vjen në mesin e thirrjeve të përsëritura nga Turqia që milicia kurde YPG në Sirinë verilindore të shpërbëhet, pas rënies së ish-presidentit sirian Bashar al-Assad muajin e kaluar, me Ankaranë që ka paralajmëruar se mund të ndërmarrë një operacion të ri ndërkufitar kundër grupit nëse shqetësimi nuk do të adresohet. YPG kryeson Forcat Demokratike Siriane aleate të SHBA-së. Turqia e konsideron atë grup terrorist pasi e sheh si një zgjatim të Partisë së jashtëligjshme të Punëtorëve të Kurdistanit (PKK), kundër së cilës Ankaraja kryen operacione të rregullta ushtarake ndërkufitare në rajonet malore të Irakut verior. Ankaraja dhe Perëndimi e konsiderojnë PKK-në një organizatë terroriste. Para rënies së Asadit, Forcat demokratike siriane ishin partnerët kryesorë lokalë të Shteteve të Bashkuara në luftën kundër Shtetit Islamik në Siri. Duke folur së bashku me homologun e tij irakian Fuad Hussein, Fidan tha se ai kishte përsëritur pritshmërinë e Turqisë që Iraku ta etiketonte zyrtarisht PKK-në një organizatë terroriste, pasi Bagdadi e njohu atë si një "organizatë të ndaluar" vitin e kaluar. "Dua ta theksoj këtë fakt në termat më të fortë: PKK po synon Turqinë, Irakun dhe Sirinë. Për të ardhmen e rajonit tonë dhe prosperitetin e popullit tonë, ne duhet të bëjmë një luftë të përbashkët kundër terrorit," tha ai. "Ne duhet të shkatërrojmë ISIS-in dhe PKK-në me të gjitha burimet tona," shtoi Fidan, duke shtuar se ai kishte diskutuar mekanizmat e mundshëm të bashkëpunimit në çështjet e inteligjencës dhe operacioneve, si dhe përfshirjen e vendeve të rajonit, kundër Shtetit Islamik gjatë vizitës së tij.