Donald Trump ndaloi agjencitë federale që të përdorin ClaudeAI, inteligjenca artificiale e kompanisë Anthropic, duke e konsideruar atë një rrezik për zinxhirin funksional të administratës amerikane, civile dhe ushtarake. Vendimi i Trump pasoi përplasjen disajavore mes Pentagonit dhe Anthropic në lidhje me përdorimin e inteligjencës artificiale. Departamenti i Luftës kërkoi përdorimin e ClaudeAI pa kufizime, duke mos përjashtuar për ndërtim armësh autonome, apo përgjime masive. Anthropic refuzoi teksa paralajmëroi se do të ngrejë padi ndaj Pentagonit dhe agjencive të tjera federale që do të ndërpresin kontratat që kanë nënshkruar me të. Ndërkohë, rivalja e saj, OpenAI ka arritur një marrëveshje me Departamentin e Luftës për të përdorur modelet e saj në ambiente të klasifikuara, duke marrë status që më parë mbahej vetëm nga Anthropic. Kontrata e Anthropic me Pentagonin është deri në 200 milionë dollarë, po aq sa kontratat e OpenAI dhe xAI.