Vijon nga toka dhe nga ajri lufta me flakët në Lurë të Dibrës, pasi zjarri ka dalë jashtë kontrollit që prej mbrëmjes së të martës. Lidhur me situatën ka reaguar edhe ministri i Brendshëm, Besfort Lamallari, i cili thotë se po punohet për shpëtimin e Parkut Kombëtar të Lurës. Ministri ka bërë thirrje që zjarrvënësit e qëllimshëm duhen evidentuar sa më parë nga Policia e Shtetit. “Zjarrvënësit e qëllimshëm duhen evidentuar sa më parë dhe plotësisht nga Policia e Shtetit, proceduar dhe ndjekur penalisht me të gjithë vetëdijen e lartë qytetare dhe angazhimin maksimal profesional të çdo prokurori, për vënien përpara drejtësisë dhe ndëshkimin e ashpër sipas ligjit penal të çdokujt që shkatërron pasurinë kombëtare të shumë gjeneratave”- shkruan ministri. Për shuarjen e flakëve, qindra forca të zjarrfikësve ndodhen në terren, të ndihmuar edhe nga 2 avionë Air Tractor.