Luftë hibride të orkestruar nga iranianët, e konsideroi kryeministri Edi Rama, gjithë narrativën e krijuar për investimin në Zvërnec të dhëndrit dhe vajzës së presidentit amerikan, Donald Trump. Në hyrje të samitit mes Bashkimit Europian dhe Ballkanit Perëndimor që u mbajt në Tivat, shefi i ekzekutivit, Edi Rama u përball me interesin e mediave të huaja për investimin në Zvërnec dhe protestat në rrugët e kryeqytetit. Rama: “Kjo lidhet, para së gjithash, me një luftë hibride dhe me armiqtë e vendit. Ne e dimë kush janë. Kushdo që njeh historinë tonë, i njeh edhe ata. Iranianët, të cilët prej kohësh janë përfshirë në sulme kibernetike kundër nesh dhe që na kanë shkaktuar aq shumë dëme saqë u detyruam t’i dëbonim, janë pjesë e kësaj përpjekjeje për të ushqyer narrativën se projekti nuk është ai që thuhet se është, por një marrëveshje mes meje dhe Netanyahut, e sajuar nga Jared Kushner, për të sjellë palestinezët nga Gaza në Shqipëri.”