Ukraina dhe Rusia kryen sulme ajrore mbi njëra-tjetrën, përgjatë brigjeve të Detit të Zi, mëngjesin e të enjtes, disa orë pasi bisedimet e shkurtra të drejtpërdrejta mes tyre nuk arritën të shënonin ndonjë përparim në hapat për t'i dhënë fund luftës që tashmë ka hyrë në vitin e saj të katërt.Forcat ruse kryen më të fundit në një seri sulmesh masive me dronë në portin e Detit të Zi të Ukrainës, Odesa, duke plagosur të paktën katër persona dhe duke shkaktuar disa zjarre si edhe dëme në qendrën historike, një vend i trashëgimisë botërore të UNESCO-s.Zyrtarët e emergjencave në rajonin Krasnodar të Rusisë,po në Detin e Zi, thanë se mbetjet e një droni goditën dhe vranë një grua në Adler, pranë qytetit turistik të Soçit. Një grua tjetër po trajtohet në spital për lëndime të rënda. Kreu administrativ i rajonit Sirius në jug të Soçit tha se një dron goditi një pikë nafte, duke mos dhënë detaje të mëtejshme. Autoriteti aviacional i Rusisë tha se operacionet u pezulluan në aeroportin e Soçit për rreth katër orë.Rusia gjithashtu sulmoi rajonin qendror Cherkasy, të Ukrainës, gjatë natës, duke plagosur shtatë persona, përfshirë një nëntëvjeçar, dhe duke dëmtuar disa ndërtesa banimi. Negociatorët nga të dyja vendet kishin diskutuar më herët shkëmbimin e të burgosurve në një seancë të shkurtër bisedimesh paqeje në qytetin turk të Stambollit, por ata mbetën larg njëri-tjetrit për kushtet e armëpushimit si edhe për një takim të mundshëm mes udhëheqësve të tyre.