Polonia po ndërton një ushtri të fortë dhe do një rol udhëheqës në BE. Prandaj po lufton Gjermaninë pothuajse në të gjitha frontet. Kjo është një përplasje e re në zemër të Evropës, e cila mund të përcaktojë të ardhmen e unionit. Që nga fillimi i vitit në Poloninë lindore një grup ushtarësh gjermanë ka operuar sistemet e mbrojtjes kundër raketave Patriot. Është prania më e rëndësishme ushtarake gjermane në Poloni që nga Lufta e Dytë Botërore. Ata janë atje si pjesë e përpjekjeve të NATO-s për të forcuar krahun lindor, por po testojnë marrëdhëniet e Berlinit me Varshavën. Marrëdhënia midis dy vendeve është kritike jo vetëm për to, por edhe për Evropën në tërësi, sidomos tani që fuqitë perëndimore duan të tregojnë unitet kundër planeve ekspansioniste të Vladimir Putin, i cili duke pushtuar Ukrainën ka vënë edhe Evropën Lindore në qendër të gjeopolitikës globale.