Për shumë muaj pas pushtimit të plotë rus ndaj Ukrainws, Kina qwndroi kryesisht e heshtur dhe e padukshme në skenën globale. Por në fund të vitit të kaluar, situata ndryshoi dhe Pekini zyrtar doli nga vetëizolimi virtual, duke u bërë sërish një nga lojtarët më të dukshëm në politikën botërore. “Plani i paqes” kinez dhe negociatat kino-ruse në nivelin më të lartë ishin në qendër të vëmendjes, por ndryshimet më të mëdha në politikën e Pekinit në muajt e fundit kanë ndodhur në Lindjen e Mesme. Në fakt, rikthimi aktual kinez filloi në këtë rajon të rëndësishëm, pasi në dhjetor, Xi Jinping shkoi në Riad për vizitën e parë të huaj të periudhës pas Covid. Udhëtimi plot ngjarje i liderit kinez në Gadishullin Arabik u pasua nga vizita e presidentit iranian Ibrahim Raisi në Pekin dhe në fund nënshkrimi i marrëveshjes saudio-iraniane me ndërmjetësimin e Republikës Popullore të Kinës. Të gjitha këto ngjarje u zhvilluan në më pak se tre muaj, gjë që tregon jo vetëm përgatitjen e kujdesshme të këtyre hapave, por edhe praninë e një plani strategjik në Kinë.