Numri i personave që janë larguar nga shtëpitë e tyre për shkak të luftës, dhunës dhe përndjekjes ka arritur në 114 milionë dhe ky numër po rritet për shkak se shtetet kanë dështuar të luftojnë shkaqet, ndërsa palët e përfshira në luftë refuzojnë të respektojnë ligjin ndërkombëtar. Shefi i agjencisë së Kombeve të Bashkuara për refugjatët, Filipo Grandi, kritikoi Këshillin e Sigurimit të OKB-së, që është përgjegjës për ruajtjen e paqes dhe sigurisë ndërkombëtare, duke thënë se ka dështuar të përdorë zërin e tij për të tentuar që të zgjidhë konfliktet duke nisur nga Gaza e Ukraina dhe nga Sudani e deri në Kongo, Mianmar dhe pjesë të tjera të botës. Ai po ashtu akuzoi shtete, emrat e të cilëve nuk i përmendi, se po marrin “vendime shkurtpamëse të politikës së jashtme që shpesh janë të bazuara në standarde të dyfishta”. Grandi tha se mosrespektimi i ligjit ndërkombëtar do të thotë se “palët në konflikt” kanë “ndaluar së respektuari ligjet e luftës” edhe pse disa prej tyre pretendojnë se po i respektojnë. Rezultat i gjithë kësaj janë më shumë vdekje civilësh, përdorimi i dhunës seksuale si armë në luftë, sulmet dhe shkatërrimet e spitaleve, shkollave dhe infrastrukturës tjetër civile dhe shënjestrimi i punonjësve të ndihmave, tha Grandi. Ai kritikoi Këshillin e Sigurimit për shkak të dhjetëra mijëra personave të vrarë në Gazë, Ukrainë, Sudan dhe në konflikte të tjera. “Por, nuk është vonë që të vendosni fokusin dhe energjinë tuaj në krizat dhe konfliktet që janë ende të pazgjidhura, në mënyrë që ato të mos përkeqësohen dhe të shpërthejnë sërish. Nuk është vonë që të ndihmoni miliona persona që janë zhvendosur me forcë”, tha ai.