Katër luftanije ruse, duke përfshirë një nëndetëse me energji bërthamore dhe një fregatë, kanë mbërritur në Kubë, në atë që shihet si një shfaqje force në mesin e tensioneve me Perëndimin për luftën në Ukrainë. Luftanijet janë ankoruar në Gjirin e Havanës, rreth 145 km larg nga shteti amerikan i Floridës. Ministria ruse e mbrojtjes thotë se fregata Admiral Gorshkov dhe nëndetësja Kazan, mbajnë të dyja armë të avancuara, duke përfshirë raketat hipersonike Zircon. Më herët, luftanijet kryen stërvitje me raketa në Atlantik. Por ministria e jashtme e Kubës thotë se asnjë nga anijet nuk ka armë bërthamore në bord dhe vizita e tyre pesë-ditore nuk përbën kërcënim për rajonin. Zyrtarët amerikanë thanë po ahstu se po e monitorojnë nga afër situatën. Marina amerikane përdori madje dronë detare për të monitoruar luftanijet ruse teksa ato iu afruan Kubës, raporton partneri amerikan i BBC-së, CBS. Herët në mëngjes, luftanijet ruse hynë në Gjirin e Havanës, të rrethuara nga anije më të vogla mbështetëse. Në një deklaratë, ministria ruse e mbrojtjes tha se vizita ishte jozyrtare, dhe do t’i mundësonte ekuipazheve të "pushojnë dhe të njihen me atraksionet lokale". Rusia ka dërguar anije luftarake në Kubë edhe në të kaluarën dhe të dyja vendet janë aleatë të vjetër, por koha kur po kryhen këto lëvizje të vecanta, bie në sy. Vizita vjen në mesin e tensioneve mes rusisë dhe perëndimit dhe duket se mbart edhe një mesazh të qartë të kremlinit për Uashingtonin, mesazhin se rusia po hyn në oborrin e shtëpisë së tij. Pas ndalesës në Havana, flota ruse do të vijojë drejt venezuelës.