Një luftanije kanadeze kaloi përmes ngushticës së Tajvanit në atë që Otava e quajti një angazhim për një Indo-Paqësor të hapur, duke ndezur reagimin e ashpër të kinës sipas të cilës, manovra detare minon paqen. Ministria e Mbrojtjes e Kanadasë tha se fregata HMCS Montreal kishte "kryer kohët një tranzit rutinë" përmes ngushticës së Tajvanit në atë që ministri kanadez i mbrojtjes tha se ishte një riafirmim i angazhimit të Kanadasë për një Indo-Paqësor "të lirë, të hapur dhe gjithëpërfshirës". "Siç është përshkruar në Strategjinë tonë të Indo-Paqësorit, Kanadaja po rrit praninë e Marinës Mbretërore Kanadeze në rajon," tha Ministri i Mbrojtjes Bill Blair, duke iu referuar planit të Kanadasë të shpallur në vitin 2022. Një zëdhënës i ushtrisë kineze tha ndërkohë se kalimi i fregatës kanadeze më 31 korrik kishte "acaruar situatën dhe minuar paqen e stabilitetin në ngushticën e Tajvanit". Trupat kineze, shtoi ai, ishin në gatishmëri të lartë në çdo kohë dhe janë "gati për t'iu përgjigjur të gjitha kërcënimeve dhe provokimeve". Kina pretendon sovranitetin mbi Tajvanin e qeverisur në mënyrë demokratike dhe thotë se ka juridiksion mbi rrugën ujore gati 180 km të gjerë që ndan të dy palët. Tajvani dhe Shtetet e Bashkuara e kundërshtojnë këtë, duke thënë se ngushtica e Tajvanit është një rrugë ujore ndërkombëtare. Anijet luftarake të SHBA-së dhe ndonjëherë edhe avionët e patrullimit të marinës, kalojnë përmes ose mbi ngushticë, rreth një herë në muaj. Anijet detare kanadeze janë më pak të zakonshme, megjithëse nëntorin e kaluar destrojeri amerikan USS Rafael Peralta dhe një fregatë e Marinës Mbretërore Kanadeze HMCS Ottaëa kryen një tranzit të përbashkët përmes ngushticës. Qershorin e kaluar, gjatë një stërvitjeje të përbashkët mes SHBA-së dhe Kanadasë në ngushticë, një luftanije kineze u afrua deri në 137 metra larg një destrojeri amerikan, sipas Pentagonit, në "një mënyrë të rrezikshme".