Në Rusi, ndikimi i sulmeve me raketa dhe dronë të Ukrainës në infrastrukturën energjetike nga Moska në Detin e Zi dhe më gjerë ka qenë prej kohësh i dukshëm. Radhë në stacionet e benzinës. Racionimi i karburantit në shkallë të gjerë. Rafineritë goditen. Shoferëve në gadishullin ukrainas të Krimesë, të aneksuar nga Rusia, u ndalohet mbushja e rezervuarëve të tyre, në mënyrë që përparësi t'u jepet automjeteve ushtarake. Por kaq e rëndë është situata, saqë tani është pranuar shprehimisht nga Presidenti Vladimir Putin për herë të parë. Gjatë fundjavës, presidenti i Rusisë diskutoi krizën me zyrtarë të lartë dhe drejtues të kompanive të naftës. Dhe në deklaratat publike, ai ishte jashtëzakonisht i sinqertë. "Ju jeni shumë të vetëdijshëm se problemet vazhdojnë si për shoferët ashtu edhe për bizneset," tha ai në takim. "Fatkeqësisht, ende ka radhë në pikat e karburantit dhe gjetja e gradës së duhur të benzinës nuk është gjithmonë e lehtë.", shtoi ai. Sipas medias së pavarur ruse Mediazona, 56 rajone ruse aktualisht po zbatojnë kufizime të karburantit. Më vonë, në një intervistë me televizionin shtetëror rus, Putini ishte edhe më i hapur. Ai pranoi se sulmet e Ukrainës “padyshim po krijonin probleme”: “Aktualisht po shohim një mungesë të caktuar”, tha ai, “por nuk është kritike”.