Një zyrtar i lartë i administratës së presidentit amerikan, Joe Biden, paralajmëroi për rrezikun e një konflikti të madh rajonal në lindjen e mesme të hënën. Ai foli në kushte anonimiteti për agjencinë e lajmeve Reuteres dhe tha se shkalla e përgjigjes së Iranit dhe Hezbollahut, do të ishte një faktor kyç në përcaktimin e shtrirjes së një konflikti të mundshëm. Pavarësisht përpjekjeve të shteteve perëndimore dhe atyre rajonale për të bindur Iranin që të mos hakmerret ose ta bëjë këtë në mënyrë të matur, Teherani u ka thënë zyrtarëve të huaj se do të përgjigjet "rreptësisht" pas vrasjes së liderit politik të Hamasit, Ismail Haniyeh, në Teheran. Në Liban, një burim i afërt me Hezbollahun tha se "një sulm hakmarrës është i pashmangshëm dhe diplomacia nuk është më një opsion ", duke shtuar se Irani dëshiron që sulmi të jetë "i ashpër", por të mos çojë në një luftë rajonale. Megjithatë, tha ai, kjo nuk përjashton mundësinë e një lufte në Liban mes Hezbollahut dhe Izraelit. Një zyrtar i lartë amerikan i fokusuar në Lindjen e Mesme tha se Uashingtoni po bënte gjithçka që mundej "për t'i bindur të gjitha palët që të mos arrijnë në një pikë nga ku nuk ka më kthim ", duke theksuar se shtetet e tjera në rajon dhe Evropa duhet të bëjnë më shumë. Një zyrtar i Katarit tha se Doha ishte në diskutime të vazhdueshme me Iranin për të ulur tensionet.