Lufta e Iranit u zgjerua gjatë fundjavës pavarësisht një pauze në sulmet e SHBA-së, ndërsa Huthit e Jemenit, të lidhur me Iranin, sulmuan instalimet saudite të naftës përgjatë Detit të Kuq dhe Irani akuzoi Ukrainën se kishte goditur një nga anijet e saj në Detin Kaspik. Ushtria amerikane tha të shtunën se bllokada e saj detare kundër Iranit "mbetet në fuqi", por nuk shpjegoi pse ndaloi një seri prej 13 netësh sulmesh në rritje. Gjithashtu nuk pati raportime në fundjavë për sulme nga Irani ndaj fqinjëve, të ngjashme me reagimet e përditshme ndaj sulmeve të SHBA-së. I pyetur për pauzën, një zyrtar i lartë në administratën e Presidentit Donald Trump tha se ky i fundit "gjithmonë ka qenë i qartë se preferenca e tij është diplomacia, por ai i ka treguar Iranit se çfarë do të ndodhë nëse ata nuk arrijnë të ulen në tryezë në një mënyrë serioze". Trump ka vendosur, për momentin, të tërhiqet nga planet për të intensifikuar sulmet ndaj Iranit, tha Neë York Times të shtunën, duke cituar dy persona të informuar mbi diskutimin. Gazeta tha se presidenti dhe këshilltarët e tij kanë shqetësime në lidhje me zgjerimin e konfliktit, shterimin e rezervave të mbrojtjes, zemërimin e aleatëve të Gjirit në Lindjen e Mesme dhe ndikimin në furnizimet me energji dhe ekonominë globale.