Degët e Partisë Demokratike prej disa ditësh kanë filluar të publikojnë emrat e delegatëve që kanë firmosur për mbledhjen e Kuvendit Kombëtar të partisë më 11 Dhjetorit të thirrur nga ish-kryeministri Sali Berisha, edhe pse fillimisht u tha se ato do të bëheshin publike vëtëm ditën kur do të mblidhej Kuvendi. Këtë të shtunë, ka qenë Dega e Elbasanit e cila ka publikuar emrat e fimëtarëve. Ato janë lexuar publikisht para mediave për qëllim transparence nga sekretari i degës, Bledi Himçi. Sipas shifrave të dhëna nga ky i fundit, në degën e Elbasanit kanë firmosur 272 delegatë nga 409 në total, ose e thënë ndryshe 67% e delegatëve të degës. Himçi deklaroi se delegatët kanë firmosur me vullnet, dëshirë dhe bindje të plotë për të ndryshuar tashmë rrjedhën e Partisë Demokratike. Deri tani, emrat e delegatëve që kanë firmosur pro Kuvendit të 11 dhjetorit i kanë publikuar vetëm 4 nga 72 degë në të gjithë vendin.