India ka mbyllur hapësirën e saj ajrore për linjat ajrore pakistaneze. Vendimi vjen në një kohë kur janë përshkallëzuar tensionet midis dy vendeve, pas sulmit vdekjeprurës ndaj turistëve në Kashmir. “Hapësira ajrore e Indisë do të jetë e mbyllur nga sot, 30 prill, deri më 23 maj”, njoftoi qeveria. Ndërkohë nga ana tjetër Pakistani tha se India mund të sulmojë brenda këtyte dy ditëve. "Pakistani nuk do të sulmojë i pari, por nuk do të hezitojë të përgjigjet", paralajmëroi Ministri i Jashtëm Ishaq Dar, pasi kryeministri indian Narendra Modi thuhet se i dha ushtrisë një "çek të bardhë". Ndërkohë kryeministri pakistanez Shehbaz Sharif foli në telefon me Sekretarin e Shtetit të SHBA-së Marco Rubio dhe akuzoi Indinë se po përpiqet të përshkallëzojë situatën. Ai i kërkoi kreut të diplomacisë amerikane të ushtronte presion mbi Nju Delhin që të mbante një "qëndrim të përgjegjshëm" dhe të ulte tensionet.