Të paktën 16 persona u vranë si pasojë e luftimeve që u zhvilluan në disa fronte në Lindjen e Mesme këtë të enjte. Pese prej viktimave u shënuan në Izraelin verior. Ata u goditën nga një raketë që u hodh nga ana e Hezbollah. Sipas autoriteteve, viktimat ishin një fermer dhe katër punonjës të huaj. Ndërkohë nga ana tjetër, Libani konfirmoi tetë të vrarë në jug ë vendit. Luftimet vazhduan dhe në Bregun Perëndimor, ku zyrtarët palestinezë thanë se u vranë 3 njerëz. Ndërkohë ushtria izraelite njoftoi se sulmoi depot e armëve të grupit militant Hezbollah dhe bazat e tij në Siri. Sipas ushtrisë izraelite, në këto baza siriane, përgjatë kufirit Siri-Liban, grupi Hezbollah ka filluar të mbledhë armët para se t’i dërgojë ato kontrabandë në Liban. Nga ana tejtër ushtria lajmëroi të gjithë banorët e qytetit Baalbek që të largoheshin ndërsa goditi një sërë objektesh të grupit militant. Por teksa luftimet vijuan ndërmjetësit amerikanë dhe ata izraelitë u takuan në Izrael për të diskutuar përpjekjet për të arritur një marrëveshje armëpushimi në Liban, ku kryeministri izraelit kërkoi garanci për sigurinë e vendit të tij. “Kryeministri ka thënë se çështja kryesore nuk është ajo që shkruhet në letër për këtë marrëveshje apo ndonjë tjetër, por vendosmëria dhe kapaciteti i Izraelit për t’u siguruar që marrëveshja të zbatohet dhe për të penguar të gjitha kërcënimet e sigurisë nga Libani”, njoftoi zyra e Kryeministrit Netanyahu pas takimit në Jerusalem ndërsa duket se arritja e një marrëveshjeje është ende larg.