Liderët e NATO-s do të takohen në Vilnius më 11 dhe 12 korrik për të trajtuar një sërë çështjesh, duke nisur nga ndasitë lidhur me anëtarësimin e mundshëm të Ukrainës dhe pranimin e Suedisë, e deri te rritja e furnizimeve me municion dhe shqyrtimi i planeve të mbrojtjes pas shumë dekadash. Ky do të jetë samiti i katërt i NATO-s që kur Rusia nisi pushtimin e Ukrainës, pasi samiti i parë ishte mbajtur virtualisht më 25 shkurt 2022, një ditë pasi Rusia nisi luftën. Dy samitet e tjera janë mbajtur në Bruksel dhe Madrid. Takimet e shumta janë në kontrast me ritmin paraprak të samiteve vjetore të NATO-s dhe tregojnë se si lufta, që gjendet në pragun e aleancës, e ka sjellë NATO-n në fokus. Masat e sigurisë në Vilnius do të jenë të larta, përderisa do të dislokohen tri njësi gjermane të mbrojtjes ajrore, Patriot, për të ofruar siguri gjatë mbajtjes së samitit. Edhe avionë të tjerë luftarakë do të patrullojnë në qiellin e Lituanisë, shtet që gjendet midis enklavës ruse të Kaliningradit e Bjellorusisë dhe që një kohë të gjatë shihet si një pikë e brishtë në krahun lindor të NATO-s. Ndër cështjet kryesore që do të diskutohen në samit ndërkohë janë ajo e anëtarësimit të mundshëm të Ukrainës në NATO, garancitë e sigurisë për Ukrainën, forcimi i krahut lindor të aleancës, si edhe cështja e Suedisë e cila synon të bëhet anëtarja e 32-të e bllokut perëndimor të mbrojtjes, por që po pengohet nga Turqia. Edhe shpenzimet ushtarake të aleancës do të jenë në fokus ndërkohë që vendet kanë nisur ti afrohen objektivit prej 2 për qind të prodhimit të brendshëm bruto, që kërkohet prej kohësh nga NATO.