Më shumë raketa Patriot dhe sisteme të tjera të mbrojtjes ajrore, ishte kërkesa e presidentit ukrainas Volodymyr Zelenski për udhëheqësin amerikan Donald Trump gjatë takimit që patën në Davos të Zvicrës këtë të enjte, ndërsa të dërguarit amerikanë po përgatiten të zhvillojnë një raund tjetër bisedimesh në Moskë me kreun e Kremlinit, Vladimir Putinin. Zelensky gjithashtu përmendi mundësinë e bisedimeve trepalëshe mes ekipeve ruse, ukrainase dhe amerikane në Emiratet e Bashkuara Arabe më 23-24 janar ndërsa theksoi se ka rënë dakord me Trump për garancitë e sigurisë pas përfundimit të luftës. Ndërkohë nga ana tjetër Trump tha se “Takimi me presidentin Zelensky ishte i mirë.” “Do të shohim se çfarë rezultati do të dalë”, pohoi presidenti amerikan gjatë një prononcimi të shkurtër për gazetarë, duke shtuar se mesazhi i tij për Putinin është: “Lufta duhet të përfundojë”. Pak pas këtyre deklaratave të Trumpit, Zelensky mbajti një fjalim, që u pasua nga një sesion i shkurtër i pyetjeve, kur ai tha se mesazhi i tij kryesor është se Ukraina ka nevojë për mbrojtje shtesë kundër sulmeve ruse me dronë dhe raketa, që kanë lënë deri në 1 milion njerëz pa ngrohje dhe energji elektrike në kohën kur temperaturat janë nën zero. “Fjalët e mia të fundit… për presidentin Trump [ishin]: Mos harroni mbrojtjen ajrore, mos harroni Patriotët”, tha Zelensky. Duke kritikuar “mungesën e vullnetit politik” në Evropë, ai gjithashtu bëri një krahasim me mënyrën se si forcat detare amerikane kapnin cisterna të flotës në hije, ndërsa “nafta ruse transportohet përgjatë brigjeve evropiane” pa u penguar. “Le t’i japin fund kësaj”, dhe se bisedimet për paqe me Rusinë tani po hyjnë në “kilometrin e fundit”, tha ai,