Komuniteti amerikan i zbulimit mendon se ritmi i ngadalësuar i luftimeve në Ukrainë do të vazhdojë në muajt e ardhshëm, tha Drejtoresha e Zbulimit Kombëtar në Shtetet e Bashkuara, Avril Haines. Duke folur në Kaliforni, Haines paraqiti vlerësimin e shërbimeve amerikane të zbulimit për një sërë temash, përfshirë luftën në Ukrainë, Rusinë dhe protestat në Kinë. Drejtoresha e Zbulimit Kombëtar Avril Haines tha se intensiteti i konfliktit në Ukrainë ka rënë, por Shtetet e Bashkuara mendojnë se si Ukraina ashtu edhe Rusia do të përgatiten për kundërofensivë në pranverë. “Mendojmë se të dyja ushtritë do të jenë në një situatë ku do të përpiqen të rifurnizohen, të përforcohen dhe riformatohen. Por, kemi realisht një nivel të konsiderueshëm mosbesimi nëse rusët do të jenë në gjendje t’ia arrijnë kësaj. Dhe në fakt jam më optimiste për ukrainasit në këtë kuadër kohor”, tha Haines.