Në fjalën e mbajtur në Workshopin- Cashless Albania, Guvernatori Gent Sejko tha se kalimi nga një ekonomi pa para fizike nuk është thjesht çështje e zhvillimit teknologjik, por pasqyron transformimin strukturor që po përjeton shoqëria dhe sistemi financiar shqiptar. Prej vitesh, Banka e Shqipërisë ka qenë promotore dhe udhëheqëse e reformave në fushën e digjitalizimit të pagesave, me qëllim reduktimin e përdorimit të cash-it dhe përfitimeve që rrjedhin prej tij. Të dhënat statistikore konfirmojnë ndikimet pozitive të këtyre reformave. Numri i pagesave digjitale për frymë llogaritet në 29 në vit, nga 5 pagesa 10 vite më parë. Pagesat digjitale vijojnë të shënojnë rritje prej rreth 25% çdo vit dhe zënë peshën më të madhe në totalin e pagesave të regjistruara në sistemet tona. Numri i kartave në qarkullim ka arritur në 1.5 milionë; rrjeti i terminaleve POS zgjerohet çdo muaj, me një shtrirje më të madhe gjeografike. Këto të dhëna pasqyrojnë tendenca strukturore të konsoliduara dhe konfirmojnë rritjen e besimit të publikut ndaj instrumenteve elektronike të pagesave.