Katari ka shprehur optimizëm për ecurinë e përpjekjeve diplomatike në krizën e Lindjes së Mesme, duke deklaruar se një marrëveshje mund të arrihet brenda orëve ose ditëve në vijim. Zëdhënësi i Ministrisë së Jashtme të Katarit tha gjatë një konference për media se Doha vazhdon të bëjë thirrje për uljen e tensioneve dhe dialog mes palëve, ndërsa mbështet aktivisht përpjekjet ndërmjetësuese të Omanit. Sipas tij, aktualisht nuk ka negociata të drejtpërdrejta mes palëve, por ndërmjetësit janë në kontakt të vazhdueshëm dhe po shkëmbejnë e shqyrtojnë draft-marrëveshje, një proces që vijon që nga fillimi i konfliktit. Ai u ndal edhe te situata në Ngushticën e Hormuzit, duke theksuar se Katari mbështet rihapjen e plotë të saj dhe garantimin e lirisë së lundrimit. Zëdhënësi përmendi gjithashtu mosmarrëveshjen lidhur me propozimin e Iranit për vendosjen e një tarife për kalimin e anijeve në Ngushticën e Hormuzit, një ide që është kundërshtuar nga Shtetet e Bashkuara. Në përfundim, ai theksoi se çështja e Ngushticës së Hormuzit duhet të zgjidhet nga vetë vendet e rajonit.