Liderët globalë kanë paralajmëruar se përshkallëzimi i konfliktit të armatosur është kërcënimi më urgjent në vitin 2025, por urgjenca klimatike pritet të shkaktojë po ashtu shqetësimin më të madh gjatë dekadës së ardhshme, sipas Forumit Ekonomik Botëror. Përpara mbledhjes së përvitshme në resortin zviceran të skive në Davos javën e ardhshme, Forumi ekonomik botëror pyeti më shumë se 900 drejtues nga biznesi, politika dhe bota akademike për rreziqet që i shqetësojnë më shumë. Me sytë nga 12 muajt e ardhshëm, 23% e të anketuarve kishin frikë nga "konfliktet e armatosura", pasi Rusia vazhdon të zhvillojë luftë në Ukrainë dhe një seri përleshjesh të tjera vdekjeprurëse vazhdojnë, duke përfshirë në Sudan dhe Gaza. E ndërsa zjarret shkatërruese vazhdojnë të tërbohen në Los Anxhelos, rreziku i dytë më i theksuar për vitin 2025 ishin "ngjarjet ekstreme të motit", të veçuara nga 14% e të anketuarve. Gjatë gjithë vitit të kaluar, një seri përmbytjesh, thatësirash dhe zjarresh dramatike nxorrën në pah ndikimin e krizës klimatike në modelet e motit, me shkencëtarët që zbuluan se ngrohja globale i bën ngjarje të tilla më të mundshme dhe, në shumë raste, më ekstreme. Kur udhëheqësve globalë iu kërkua të shikonin më tej dhe të identifikonin rreziqet më të mëdha me të cilat përballet bota gjatë dekadës së ardhshme, katër nga 10 përgjigjet e tyre kryesore kishin të bënin me krizën klimatike. Po ashtu, janë shfaqur edhe shqetësime në lidhje me inovacionin teknologjik dhe inteligjencën artificiale.