Ka edhe fëmijë mes të paktën 10 viktimave të regjistruara në Izrael pas breshërisë së raketave të lëshuara nga Irani, në raundin më të fundit të sulmeve të përshkallëzuara mes dy vendeve. Irani tha se Izraeli goditi dy rafineri nafte pranë Teheranit gjatë natës, si dhe selinë e Ministrisë së Mbrojtjes së Iranit, ndërsa Izraeli tha se numri i viktimave kishte shkuar në 10, ndërsa punonjësit e emergjencave kërkojnë me dëshpërim nëpër rrënoja për të gjetur të plagosur. Rreth 200 persona në Izrael u plagosën nga sulmet. Përveç kësaj, shtatë persona dyshohet se janë të zhdukur në qytetin izraelit Bat Yam. Ambasadori i Iranit në OKB tha se deri të premten në mbrëmje, sulmet izraelite kishin vrarë 78 persona dhe kishin lënë mbi 320 të plagosur. Të shtunën, Irani tha se 60 persona, përfshirë 29 fëmijë, u vranë pasi një raketë izraelite rrëzoi një bllok apartamentesh 14-katësh. Rajoni është përgatitur për një konflikt të zgjatur pas sulmit të papritur të Izraelit ndaj vendeve bërthamore dhe ushtarake të Iranit të premten, duke vrarë disa gjeneralë të lartë dhe shkencëtarë bërthamorë, dhe asnjëra palë nuk tregon shenja tërheqjeje. Ministri i Jashtëm i Iranit, Abbas Araghchi, tha se sulmet ndaj Izraelit do të përfundojnë kur të ndalet "agresioni" i tij. Ai gjithashtu akuzoi Këshillin e Sigurimit të OKB-së për "indiferencë" ndaj sulmeve të Izraelit ndaj Iranit. Ai pretendoi në një takim me diplomatë të huaj se qeveritë perëndimore kanë "dënuar Iranin në vend të Izraelit, pavarësisht se është pala që u sulmua". Ai gjithashtu pretendoi se ka "prova të forta" se trupat amerikane kanë mbështetur sulmet e Izraelit kundër Iranit. Ndërkohë, Izraeli i ka paralajmëruar iranianët që jetojnë pranë vendeve të prodhimit të armëve në Iran të largohen, duke sinjalizuar një përshkallëzim të afërt të veprimeve ushtarake. Kryeministri izraelit Benjamin Netanyahu tha mbrëmjen e të shtunës në një fjalim se Izraeli do të “sulmonte çdo vend dhe çdo objektiv të regjimit të Ajatollah-ut”. Ndërkohë tani në lojë kanë hyrë edhe Huthit, nga jemeni, që shënjestruan të dielën Jaffa-n, në izraelin qendror me raketa balistike.