Administrata Biden kishte refuzuar për muaj të tërë të autorizonte Ukrainën të godiste Rusinë me raketa me rreze të gjatë veprimi, nga frika e përshkallëzimit të konfliktit. Vladimir Putin ka paralajmëruar zëshëm kundër lejimit të përdorimit të armëve perëndimore për të goditur Rusinë, duke thënë se Moska do ta konsideronte këtë si "pjesëmarrje të drejtpërdrejtë" të vendeve të NATO-s në luftën në Ukrainë. "Kjo do të ndryshonte thelbësisht natyrën e konfliktit," tha Putin në shtator. “Kjo do të thotë se vendet e NATO-s, SHBA-të dhe shtetet evropiane, po luftojnë me Rusinë” – shtoi ai. Rusia kishte vendosur që në krye të herës vijat e saj të kuqe. Disa prej tyre, duke përfshirë sigurimin e tankeve moderne të betejës dhe avionëve luftarakë për Ukrainën, janë kaluar që atëherë pa shkaktuar një luftë të drejtpërdrejtë midis Rusisë dhe NATO-s. Kurt Volker, një ish-ambasador i SHBA-së në NATO, thotë: “Duke kufizuar gamën e përdorimit të armëve amerikane nga Ukraina, SHBA-ja po vendoste në mënyrë të pajustifikueshme kufizime të njëanshme në vetëmbrojtje të Ukrainës”. Ai shtoi se vendimi për të kufizuar përdorimin e ATACMS ishte "plotësisht arbitrar dhe i bazuar tek frika e "provokimit" të Rusisë. “Megjithatë, është gabim të bësh publik një ndryshim të tillë, pasi i jep Rusisë njoftim paraprak për sulmet e mundshme të Ukrainës”-thotë ai.