Konfliktet moderne tashmë po zhvillohen në hapësirë dhe luftërat e ardhshme do të fillojnë atje, tha Presidenti Francez Emmanuel Macron, duke veçuar kërcënimin që paraqet Rusia dhe duke njoftuar një rritje prej shumë miliardë eurosh në shpenzimet për aktivitetet ushtarake në hapësirë. "Lufta e sotme tashmë po zhvillohet në hapësirë dhe lufta e së nesërmes do të fillojë në hapësirë", tha Macron në Tuluzë, ku ndodhet qendra hapësinore dhe e aviacionit të Francës, shtëpia e qendrës së re të komandës ushtarake hapësinore. "Hapësira nuk është më një strehë, ajo është bërë një fushë beteje", tha Macron. Ai tha se Rusia, pas pushtimit të plotë të Ukrainës në vitin 2022, po kryen aktivitete "spiunazhi" në hapësirë. Anijet hapësinore ruse po monitorojnë satelitët francezë, ka bllokim masiv të sinjaleve GPS dhe sulme kibernetike kundër infrastrukturës hapësinore, shtoi ai.