Forcat pushtuese ruse po vazhdojnë sulmet përgjatë vijës së frontit në lindje të Ukrainës, tha ushtria e Kievit, ndërsa zyrtarët ukrainas kanë vazhduar të paralajmërojnë se Moska po përgatitet për një ofensivë të re në këtë rajon. Gjatë 24 orëve të fundit, ushtria ruse ka kryer gjashtë sulme me raketa dhe 24 sulme ajrore, tha Shtabi i Përgjithshëm i ushtrisë ukrainase. Shtabi po ashtu tha se ka pasur 75 sulme me artileri, përfshirë një ndaj një objektivi civil në rajonet lindore dhe juglindore të Harkivit, Donjeckut, Dnipropetrovskit dhe Hersonit. Ushtria shtoi se ka pasur një numër të paspecifikuar viktimash në mesin e civilëve. Më vonë, Pavlo Kyrylenko, kreu i administratës ushtarake në Donjeck, raportoi se një person është vrarë dhe pesë të tjerë janë plagosur si rezultat i bombardimeve gjatë natës në rajonin e Donjeckut. Gjatë 24 orëve të fundit, 1.030 ushtarë rusë janë vrarë në Ukrainë, pretendoi ushtria e kievit, edhe pse shifra të tilla është e pamundur të konfirmohen në mënyrë të pavarur. Luftimet e reja vijnë pasi guvernatori i Luhanskut, Serhiy Hayday, tha se Rusia po dislokon përforcime në lindje të Ukrainës para një ofensive të re të mundshme. “Po shohim gjithnjë e më shumë rezervistë rusë që po dislokohen në drejtimin tonë. Po shohim se po sillen edhe shumë pajisje luftarake”, tha Hayday.