Ministri i Brendshëm, Sandër Lleshaj i është kundërpërgjigjur ish-deputetit të Partisë Demokratike, Enkelejd Alibeaj, që deklaroi se qeveria kërkon që të manipulojë listat për zgjedhjet, me ndryshimin e vendbanimit të qytetarëve. Lleshaj, thekson se Enkelejd Alibeaj po mashtron opinionin publik, duke trilluar operacione imagjinare. Përmes një postimi në rrjetet sociale, Lleshaj shkruan se ajo që PD-ja e konsideron operacion kriminal të qeverisë për ndryshimin e listave të zgjedhësve, nuk është ashtu. “Ajo që po ndodh, jo sot, por që prej vitit 2016, kur u miratuan ndryshimet në Ligjin për Sistemin e Adresave, është vendosja e adresave”, thekson Lleshaj. Sipas ministrit, vendosja e adresave nuk ndryshon vendbanimin dhe se qytetarët duhet të jenë të qetë pasi listat e zgjedhësve do të dalin ekzaktësisht sipas vendbanimit të qytetarëve, dhe këta të fundit do votojnë aty ku votuan për herë të fundit.